చుక్కల అమావాస్య
ఆషాఢమాసంలో వచ్చే అమావాస్యను (చివరిరోజు) చుక్కల అమావాస్య అని అంటారు. తెలంగాణలోని కొన్ని ప్రాంతాల్లో ఈనాడు కొత్తగా పెళ్ళైన కోడళ్లు ‘చుక్కల అమావాస్య’ పేరుతో నోము నోచుకుంటారు. దీనినే దీపస్తంభ వ్రతమని కూడా పిలుస్తారు. ఈ వ్రతంలో ప్రధాన దేవత గౌరీదేవి.
సూతుడు శౌనకాది మునులకు చెప్పినట్లుగా
స్కాంద పురాణంలో ఈ వ్రత ప్రసక్తి కనబడుతుంది.
వివాహం అయిన మొదటి సంవత్సరం ఒక పీటపై సున్నంతో వంద చుక్కలు పెట్టి వాటి మీద వంద దారపు పోగులను ఉంచుతారు. బియ్యం పిండితో చేసిన వంద చుక్కలను నివేదిస్తారు. ఈ సంఖ్య సంవత్సరానికో వందచొప్పున పెరిగి ఐదో సంవత్సరం ఐదువందలకు చేరుతుంది. ఆ దారపు పోగులను ఒక దండగా అల్లుకుని మర్నాటి వరకూ మెడలో ధరిస్తారు. కొంతమంది నక్షత్ర దర్శనం అయ్యాకే భోజనం చేస్తారు.
ఐదు సంవత్సరాల వరకు ఆచరించే ఈ వ్రతంలో చివరి సంవత్సరం ఉద్యాపనగా స్తోమత ఉన్నవారు బంగారపు చుక్కలను కూడా దానం చేస్తారు. తమ ఆచార వ్యవహారాలననుసరించి వ్రతాన్ని ఆచరించి, తమ మాంగళ్యం కళకాలం నిలచి ఉండాలని గౌరమ్మ ను వేడుతారు.
అప్పాల శ్యాంప్రణీత్ శర్మ
