స్యయంభూ ఏకరూప దత్తాత్రేయ స్వామి మన పల్నాడు ప్రాంత ఎత్తిపోతల

నిజమైన స్యయంభూ ఏకరూప దత్తాత్రేయ స్వామి  మన పల్నాడు ప్రాంత ఎత్తిపోతల లో తప్పితే ఎక్కడా ప్రపంచంలో లేరు..ప్రపంచంలో ఎన్ని దత్తాత్రేయ ఆలయాలు ఉన్న ఎత్తిపోతల వెలసిన స్వామి వారే నిజరూపుడు అని చెపుతున్న పురాణాలు,పండితులు:

మన పల్నాడు మాచర్ల మండలం తాళ్లపల్లి గ్రామ శివారు అటవీ ప్రాంతంలో ప్రముఖ పర్యాటకస్తలం ఎత్తిపోతల వెలసిన దత్తాత్రేయ స్వామి వారి చరిత్ర :

 పూర్వం కొన్ని వేల సంవత్సరాల క్రితం యతులు(బుషులు) దైవ కృప కోసం ఈ ప్రశాంత వాతావరణం(ఎత్తిపోతల) లో తపస్సు చేసేవారట,ఆనాటి నుండే దత్తాత్రేయ ఆలయ ఆనవాళ్లు ఉండేవని కధనాలు ఉన్నవి. ఎత్తిపోతల జలపాతం అభిముఖంగా కొండపై వెలసిన దత్తాత్రేయస్వామి వారు ఏకముఖ దత్తాత్రేయుని గా స్వయంభూగా వెలసినట్లు పురాణాల కధనం , లక్ష్మీ దేవి వారి అంశతో జన్మించి దత్తాత్రేయునికి ప్రియ శిష్యురాలి గా మారి ఆయన లో ఐక్యం అయిన మధుమతి అమ్మవారి ఆలయం కూడా మనం ఇక్కడ చూడవచ్చు. ఎత్తిపోతల దత్తాత్రేయుని కొలిస్తే కోరిన కోర్కెలు తీరతాయని,సంతానం లేని వారికి సంతాన భాగ్యం కలుగుతుందని భక్తులు చెపుతారు .కొండల్లో,నల్లమల్ల అటవీ తీరం లో వెలసిన దత్తదేవున్ని గిరిపుత్రులు ఎక్కువగా ఎత్తిపోతల ప్రాంతానికి వచ్చి ఆరాదిస్తారు. .పూర్వకాలం నుండే దత్తాత్రేయ ఆలయానికి పక్కనే గల గుహల నుండి శ్రీశైలం,దైద,గుత్తికొండ బిలాలకు మార్గమున్నట్లు ఈ ప్రాంతాల గుండా గుహల మార్గం ద్వారా బుషులు వచ్చి దత్తాత్రేయ స్వామిని కొలిచేవారని ప్రతీతి,నేటికి ఆ గుహలు ఉన్నను గబ్బిలాల కంపుతో ఉంటుంది.దానిలోపలికి వెళ్లటం ప్రమాదకరం కావున ఎవరు వెళ్లుటకు సాహసించరు. అలనాడు దైద,గుత్తికొండ బిలాల్లో కూడా దివ్యర్షులు తపస్సు చేసేవారని చారిత్రక ఆదారాలు చెపుతున్నాయి.బ్రహ్మనాయుడు కూడ పల్నాడు యుద్ద సమయం లో వీరులతో కలసి గుత్తికొండల గుహాల్లో ఉన్నట్లు మరియు అనేక మార్లు ఎత్తిపోతల సందర్శించినట్లు ఆధారాలు ఉన్నాయి. నక్కల వాగు,సూర్యవంక,చంద్రవంక లు పవిత్ర త్రివేణి సంగమంగా కలసి ప్రవహించే ఎత్తిపోతల అతి పవిత్ర మైనది కావునే ఈ ప్రాంతం లో దివ్యర్షులు తపస్సు చేసేవారట. ఇలాంటి అద్బుత త్రివేణి సంగమం ఇక్కడ మరియు కాశీ క్షేత్రం లో మాత్రమే ఉన్నదని చెపుతారు. దత్తాత్రేయ స్వామి ఆలయం పక్కనే ఉండే రంగనాధ స్వామి వారి దేవాలయం కూడా అతి పురాతన మైనది . రంగనాధ స్వామివారిని పూర్వ కాలం లో విశ్వామిత్ర,పరశురామ,వశీష్ట మహర్షులు వచ్చి దర్శించి పూజలు చేసారట. కృత యుగం,త్రేతాయుగం,ద్వాపర యుగాల కాలం నుండే ఎత్తిపోతల ప్రాంతం లో ఋషులు తపస్సు చేసారని ఇక్కడి స్తల పురాణం చెపుతుంది.

 దత్తాత్రేయ స్వామి నేటికీ సంచరిస్తున్నారా ?

అవును. ఇది యదార్ధము. ముమ్మాటికీ నిజం., ఆంధ్ర ప్రదేశ్ రాష్ట్రం లోని గుంటూరు జిల్లాలోని మాచర్ల దగ్గర వున్న "ఎత్తిపోతల" క్షేత్రంలో స్వయంభువై ఏకముఖి దత్తాత్రేయ స్వామిగా పూజలందుకుంటున్న ఈ క్షేత్రంలో ఈ సంఘటనలు ఆశ్చ్యర్యాన్నీ, మరింత విశ్వాసాన్ని కల్గిస్తోంది. ఈక్షేత్రానికి మాచర్ల గ్రామ చుట్టుప్రక్కల వున్న "తండా" ల నుండి వేలమంది భక్తులు స్వామి దర్శనానికి వస్తుంటారు. వారికి ఆచారాలు ఏమి తెలియవు. చదువు లేదు. మంత్రాలు అసలే రావు. కేవలం మూఢ భక్తి. నెయ్యితో చేసిన అన్న పరమాన్నముతో స్వామిని దర్శిస్తారు. దత్తుని మీద అపారమైన విశ్వాసం, నమ్మకం. అవే వారిని ఆరోగ్యదాయకమైన, ఆనందమయమైన జీవితాన్ని నడిపిస్తున్నాయి. గర్భాలయాల్లో రుద్రాభిషేకాలు, పంచ సూక్తాలు, శాంతిమంత్రాలు చదువుతున్న మనం, వీళ్ళను చూస్తే ఆ స్వామే వీరి చెంత ఉండడానికి ఇష్టపడుతున్నాడా? అని భావించక తప్పదు. వీరికి తల్లి, తండ్రి, అన్న, తమ్ముడు సర్వం దత్తాత్రేయుడే. " మాకు నీవే దిక్కు. అనారోగ్యం వచ్చినా, ఆర్ధిక ఇబ్బంది వచ్చినా, ఏమి కావాలన్నా నువ్వే శరణు, నువ్వే దిక్కు" అని దత్తాత్రేయుడిని ప్రార్థిస్తున్న వారి మధ్య ముసలివాని రూపంలో, చిన్న పిల్లవానిగా, పిచ్చివాడిలాగా అనేక రూపాలలో దర్శనం ఇస్తారని భక్తులు చెపుతుంటారు..

ఎత్తిపోతల దత్తాత్రేయుడు స్వయంభూ దత్తాత్రేయుడు. కొండగుహలో ఉన్న స్వయంభూ దత్తాత్రేయమూర్తిని పునః ప్రతిష్టించాడు ‘హైహయ’ వంశరాజైన కార్త్యవీర్యార్జునుడు. హైహయ వంశరాజైన కార్త్యవీర్యార్జునుడు ఈ క్షేత్రానికి దగ్గర లోగల మహీష్పతి నగరాన్ని(నేటి మాచర్ల) రాజధానిగా పరిపాలన సాగించేవాడు. అందువల్ల ఇక్కడే కార్త్యవీర్యార్జునుడు ముఖ్య పర్వదినములలో తప్పని సరిగా అనఘాస్టమీ వ్రతాలను ఆచరించేవాడు. ఈ క్షేత్ర మహిమ తెలుసుకున్నపరుశురాముడు (కార్త్యవీర్యార్జునుడి సంహరించినవాడు మరియు రేణుకామాత – జమదగ్నిల కుమారుడు) కార్త్యవీర్యార్జునుడి తదుపరి ఈ ఆలయాన్ని ఎంతగానో అభివృద్ధి చేసాడు. ప్రపంచంలోని ఏకైక సింధూరలేపన దత్తాత్రేయుడు ఇక్కడ కనిపిస్తాడు, అలాగే ప్రపంచంలోని ఏకైక ‘నాగకిరిటాభారణ’ (నాగుపామును కిరిటంగా ధరించిన) దత్తాత్రేయుడు ఏకముఖ, చతుర్భుజుడుగా కనిపిస్తాడు. విష్ణురూప, అలంకారప్రియ, చిద్విలాస మరియు నామధారి (నామమును ధరించిన) దత్తాత్రేయుడు. భక్తులు ఇక్కడి దత్తాత్రేయుడుని దర్శించుకోవడానికి వచ్చినప్పుడు కార్త్యవీర్యార్జున విరచిత దత్తస్తోత్రాలను చదివితే మిక్కిలి ప్రీతి చెందుతాడట. 

మధుమతీ దేవి దత్తాత్రేయుని శక్తి స్వరూపిణి. మధుమతి అనగా ‘తేనెవంటి హృదయం’ గలది అని అర్ధం. మధుమతీ దేవి కుడా స్వయంభూ గానే ఉద్భవించారు. విష్ణు కుండినుల కాలం లో ఈ ఆలయం జీర్ణోద్ధారణ గావింపబడినది. వారు, వారి తరువాత వచ్చిన రాజులందరూ అమ్మ వారికి భక్తులే. ఈవిడ లక్ష్మీ స్వరూపురాలు మరియు అష్ట సిద్ధులకు తల్లి. ఈవిడ పనసచుట్టులో కుటుంబ సమేతంగా ఉంటారు. ఎత్తిపోతల దత్తక్షేత్ర దర్శనానికి వచ్చిన వారు ముందుగా మధుమతీ దేవిని దర్శించి ఆ తరువాత కొండమీద గుహలో ఉన్న దత్తాత్రేయుడిని దర్శించడం ఇక్కడి ఆనవాయితి. ఎంతోమంది ఋషులకి,దత్త ఉపాసకులకి, దత్త భక్తులకీ మధుమతీ దేవి దర్శనం కలిగిందని చెబుతారు. ఈ తల్లి ప్రతినిత్యం రెండు నుండి మూడు సార్లు పైన గల కొండమీద గుహలో ఉన్న దత్తాత్రేయుడిని దర్శించడానికి వెళతారట.ఈ విధంగా పైకి వెళ్ళేటప్పుడు అమ్మ వారి పాదాలు మెట్లకు ఆనకుండా, మెట్లకు కొద్దిగా పైన గాలిలో నడుచుకుంటూ వెళ్ళడం అనేక మంది చూసారు.

దత్త శిల

‘దత్త శిల’ ఎత్తిపోతల ప్రధాన ద్వారం నుండి దత్తాత్రేయ దేవాలయానికి వెళ్ళే మెట్ల మార్గంలో పెద్ద పుట్టకు సమీపంలో కుడివైపున ఉంటుంది. దత్తాత్రేయుడు ఈ రాయి మీద కుర్చుని విశ్రాంతి తీసుకునేవాడని అనేక మంది మహర్షులు చెప్పేవారు. ఒక్కోసారి ఈ శిల మీదే దత్తాత్రేయుడు కల్లు త్రాగువాని వలె కుర్చుని కల్లు తాగుతూ కనిపిస్తాడట. నడి రాత్రిలో ఈ దత్త శిలకు శిరస్సును ఆనించి దత్తాత్రేయుడిని ధ్యానించి ఈ శిలకు దరిదాపుల్లోనే నిద్రిస్తే వారికి తప్పని సరిగా దత్తదర్శనం కలుగుతుంది.

ఇచ్చటి దత్తాత్రేయుడు మధుమతి సహితం గా ఉంటారు. మధుమతి సహిత దత్త క్షేత్రం ఇదొక్కటే. కొండ కింద ఔదుంబర వృక్షం ఎదురుగా మధుమతి దేవి ఉంటుంది. కొండ పైన గుహలో దత్తాత్రేయుల వారుంటారు. ముందుగా మధుమతి తల్లిని దర్శించి తరువాత దత్తుడిని దర్శించడం ఇక్కడి ఆనవాయితీ. ఇక్కడ దత్తుడు ఏకముఖుడు, విష్ణురూపుడు మరియు అలంకర ప్రియుడు. సింధూరం పూసుకొని ఉండే దత్తాత్రేయుడు. ఈయన విష్ణురూపుడే అయినా నాగసర్ప ప్రియుడు.ఇచ్చటి గుహ వంటి దేవాలయం లో ఖచ్చితంగా దత్తుడి విగ్రహం వెనుక పైకి పుట్టలాగా కనిపించ కుండా కేవలం కన్నాలతో ఉండే దేవ సర్పగృహము కలదు. ఇందునుండి నాగసర్పాలు వెళ్ళడం రావడం ఇక్కడ సాదారణం గా జరిగే ప్రక్రియ.

 దత్తాత్రేయ ని స్వామి జ్ఞానాన్ని ఇచ్చే గురువుగా అంధకారాన్ని తొలగించే దేవుని గా భక్తులు కొలుస్తారు.దత్తాత్రేయ స్వామి యోగ దీక్షలో మౌన మునిగా ఈ ప్రాంతం లో వెలసాడని మార్కాండేయ పురాణం చెపుతుంది ఇప్పటి కలియుగం లో కొందరు మహర్షులు అదృశ్య రూపం లో కూడా తపస్సు చేస్తుంటారని భక్తుల నమ్మకం భక్తుల నమ్మకం .అద్బుతంగా 70 అడుగుల నుండి జాలువాలే జలపాత అందాలు,నల్లమల్ల అటవీ,మొగలి పొదలు,కొండల మధ్య ఉండే దత్తాత్రేయుని ఆలయం రమణీయంగా ఉంటుంది. ఆలయం లో గణేష్ విగ్రహం,శివలింగ రూపాలు,నాగ ప్రతిమలు ఆధ్యాత్మిక భావాన్ని పెంచుతాయి,నాగు పాముల సంచారం ఈ ప్రాంతం లో ఎక్కువ కావున జంట నాగూ ప్రతిమ ఈ ఆలయ దిగువన ఏర్పాటు చేసి పూజలు చేస్తుంటారు. ప్రతి సంవత్సరం ఎత్తిపోతల లో మార్గశిర పౌర్ణమి రోజున దత్త జయంతి ఘనంగా జరిపి గొప్ప తిరునాళ్ల ఉత్సవం చేస్తారు,వేలాది గా భక్తులు వచ్చి స్వామి వారి కృప పొందుతారు. ఎత్తిపోతల జలపాతం లో మొసళ్ళు కూడా మనకు కనిపిస్తు ఉంటాయి. మొసళ్లు ఆ ప్రాంతం లో తిరుగుతున్నను ఇంతవరకు ఏ భక్తునికి హాని జరగకుండా ఉండటం,అలాగే మొగలి పొదలు మధ్య ఎక్కువగా ఉండే సర్పాల వల్ల కూడా ఎవరికి ఇబ్బంది కలగకపోవటం దత్తాత్రేయుని మహిమగా భక్తులు చెపుతుంటారు. ఇంతటి మహిమాన్విత దత్తాత్రేయ స్వామి మన పల్నాడు ప్రాంతం లో స్వయంభూ గా వెలవటం మన క్షేత్రానికే గర్వకారణం. దత్తాత్రేయస్వామిని దర్శనానికి వచ్చే భక్తులు కోసం కొండ గుహల కింద చిన్న విరామ గృహాలు నిర్మించినను తగిన సౌకర్యాలు లేవు.పూర్తి స్తాయి సౌకర్యాలు ఈ ప్రాంతం లో కల్పిస్తే కొండలు,కోనలు,పచ్చని అటవీ,మొగలి పొదల సువాసనలు,జాలువారే తెల్లనిజలపాతం,ఆలయం ను తాకుతూ పక్కనుండే వెళ్లే పవిత్ర త్రివేణి సంగమం కలిగిన ఈ ప్రాంతం దేశం లో మంచి ఆధ్యాత్మిక పర్యాటక కేంద్రంగా మారుతుంది.పర్యాటక శాఖ,ప్రభుత్వం ఈ దిశ గా చర్యలు చేపట్టాలని కోరుచున్నాం.

శ్రీ వేముల.

మహాకాళీ నిత్యలు

                        * మహాకాళీ నిత్యలు *

దశమహావిద్యలలో ఒకటైన లలితా త్రిపుర సుందరికి 16 నిత్యలు ఉండగా, కాళీకి 15 మంది నిత్యలు ఉంటారు. లలితకు చెందిన నిత్యలు చంద్రుని యొక్క శుక్లపక్షానికి చెందిన కళలుగా ఉంటె , కాళీకకు చెందిన నిత్యలు చంద్రుని యొక్క కృష్ణ పక్షానికి చెంది ఉంటాయి. 

1. కాళీ :- 

నిత్యలలో మొదటిది అయిన కాళీ , కృష్ణ పక్షంలోని మొదటి తిథి అయిన పాడ్యమికి చెంది ఉంటుంది. ఈమె భయంకర రూపాన్ని కలిగి ఉంటుంది. ఈమె అరుపు గుండెలు జలదరించేలా ఉంటుంది. ఈమె నల్లటీ రంగులో ఉంటుంది. మెడలో కపాలముల దండ , ఈమెకు బలమైన మరియు వ్రేలాడే స్థనములు ఉంటాయి. ఈమె తన కుడిచేతిలో ఒక గుండ్రగొడ్డలి ధరించి , ఎడమ చేత్తో బెదిరిస్తూ ఉన్న భంగిమలో ఉంటుంది. ఈమె శ్మశానాలలో సంచరిస్తూ ఉంటుంది. 🙏

2. కఫాలిని :-

రెండవది అయిన కఫాలిని ! కఫాలిని అంటే కఫాల కన్య అని అర్థం. అత్యంత సౌందర్యవంతమైన ముఖాన్ని కలిగి ఉంటుంది. ఈమె నల్లటీ రంగులో ఉంటుంది. జుట్టు విరబోసుకుని కనిపిస్తుంది. ఈమె నగ్నంగా ఉంటుంది. ఖండించబడిన శిరస్సుల యొక్క గుట్టమీద ఈమె కూర్చుని ఉంటుంది. ఈమె రెండు చేతుల్లో గండ్రగొడ్డలి , శూలము ఉంటాయి. ఈమెకు ఇంకొక రెండు చేతులలో ఒక చేయ్యి అభయ హస్తం ఇస్తుండగా, ఇంకో చేత్తో వరద హస్తముగా కనిపిస్తుంది..🙏

3. కుల్ల :- 

మూడవది అయిన నిత్యల్లో కుల్ల . ఈమెకు నాలుగు హాస్తాలు , మూడు నేత్రాలు ఉంటాయి. ఒక మృతదేహం పైన ఉంచబడిన పది శిరస్సులపై ఈమె కూర్చుని ఉంటుంది. ఈమె యొక్క ఎడమ చేతులలో ఒక చెయ్యి వరద హస్తముగా కనిపిస్తుంది. ఇంకొక చేత్తో అభయ హస్తం ఉంటుంది. కుడిచేతిలో ఒక చేతిలో పుస్తకం, ఇంకొక చేత్తో జపమాల ఉంటాయి. 🙏

4. కురుకుల్ల :-

నాలుగవ నిత్య అయిన కురుకుల్ల . ఈమెకు ఎత్తైన మరి పెద్దది అయిన స్థనములు ఉంటాయి. ఈమెకు అందమైన పిరుదులు ఉంటాయి. ఈమె నల్లటీ రంగులో ఉంటుంది. ఈమె జుట్టు విరబోసుకుని పుఱ్ఱెల దండను మెడలో ధరించి కనిపిస్తుంది. ఈమె ఒక మృతదేహం పైన కూర్చుని ఉంటుంది. ఈమె చేతులలో పుర్రె, కత్తెర, గండ్రగొడ్డలి మరి డాలు ఉంటాయి.🙏

5. విరోధిని :-

ఐదవది అయిన విరోధిని. పుష్టిగా మరి ఉన్నతంగా ఉన్న వక్షోజములు కలిగి ఈ నిత్య . భోమికలు మరియు సర్పములతో తయారుచేసిన హారాన్ని ధరించి కనిపిస్తుంది. చూడటానికి భయంకరంగా కనిపించడం ఈ నిత్య విశేషం. ఈమె మూడు నేత్రాలను, నాలుగు హస్తాలతో కనిపిస్తుంది. ఈమె చేతులలో శూలం, గంట , డమరుకం మరియు సర్పముతో చేసిన పాశము ఉంటాయి. ఈమె పసుపు రంగు దేహాన్ని కలిగి ఉంటుంది. వంగపండు రంగు వస్ర్తాలను ధరించి ఉంటుంది. ఈమె ఒక మృతదేహం పై కూర్చుని ఉంటుంది..🙏

6. విప్రచిత్త :-

నిత్యలలో ఆరవది అయిన విప్రచిత్త ! ఈమె నాలుగు హస్తాలతో , మూడు రేఖలను కలిగి ఉంటుంది. ఈమె శరీరం నీలి కలువ పువ్వు రంగు లో ఉంటుంది. ఈమెకు ఎత్తైన బలిష్టమైన స్థనములు ఉంటాయి. ఈమె జుట్టు విరబోసుకుని కనిపిస్తుంది. ఈమె నాలుక తరచుగా నోట్లో నుండి బయటకు లోపలికి వెళుతూ ఉంటుంది. ఈమె చూడటానికి భయంకరంగా ఉంటుంది. ఈమె చేతులలో గండ్రగొడ్డలి , ఖండించబడిన శిరస్సు, కపాలం మరియు శిరస్సు ఉంటాయి. ఈమె తన పండ్లను చూపుతూ ఉంటుంది. ఈమె నోటి చివరల నుంచి రక్తం స్రవిస్తూ కనిపిస్తుంది.🙏

7. ఉగ్ర :-

ఏడవది అయిన ఈ ఉగ్ర నిత్య , ఈమె చూడటానికి భయంకరంగా ఉంటుంది. ఈమె నగ్నంగా ఉంటుంది. ఈమె నోటి నుంచి భయంకరంగా కోరలు కనిపిస్తాయి. ఈమె కపాలమాలను ధరించి ఉంటుంది. నలుపు రంగులో ఉండే ఈ దేవీ , జుట్టు విరబోసుకుని కనిపిస్తుంది. ఈమె నాలుగు హస్తాలతో ఖడ్గం, కపాలం, చురిక మరియు కమలము కనిపిస్తాయి. ఈమె శ్మశానంలో సంచరిస్తూ ఉంటుంది.🙏

8. ఉగ్రప్రభ :-

ఎనిమిదవది అయిన ఈ ఉగ్రప్రభ ! ఈమె విరబోసుకున్న జుట్టుతో ఉబ్బెత్తుగా ఉండి పొడుచుకువచ్చిన స్థనములతో కనిపిస్తుంది. నీలి రంగులో ఉంటుంది. ప్రశాంతమైన ముఖంతో కనిపిస్తుంది. ఈమె నాలుగు హస్తాలతో , మూడు నేత్రాలతో , ఈమె శవంపై ఆశీనురాలై ఉంటుంది. ఈమె చనిపోయిన జంతువు యొక్క కుళ్ళిన మాంసాన్ని తింటూ ఉంటుంది. ఈమె నడుము చుట్టూ, ఖండించబడిన హస్తాలతో చేసిన వడ్డాణం ధరించి ఉంటుంది. ఈమె చేతులలో గండ్రగొడ్డలి, శిరస్సు, కపాలపాత్ర మరియు చిన్నఖడ్గము ఉంటాయి. 🙏

9. దీప :-

తొమ్మిదవ నిత్య అయిన దీప ! 

ఈమె నాలుగు హస్తాలతో మూడు నేత్రాలతో తదేకంగా చూస్తూ ఉన్నట్లు కనిపిస్తుంది. ఈమె పెద్దదిగా ఉండే ఇంద్రనీలం రంగులో ప్రకాశిస్తూ ఉంటుంది. 

ఈమె ఎడమ చేతులలో గండ్రగొడ్డలి, శిరస్సు ఉంటాయి! కుడిచేతులలో అభయ హస్తం మరియు వరద హస్తముగా ప్రసాదిస్తూ ఉంటుంది. ఈమెకు నోటీ నుంచి బయటకు పొడుచుకొని వచ్చి ఉన్న కోరలు కనిపిస్తాయి. నగ్నంగా ఉండే ఈ నిత్య జుట్టు విరబోసుకుని కనిపిస్తుంది. మానవ కపాలాలతో తయారయిన కంకణాలను, మానవుల ఎముకలతో తయారయిన భుజకీర్తులను ఈమె ధరించి కనిపిస్తుంది..🙏

10. నీల :-

పదవది అయిన ఈ నీల నిత్య ! పుర్రెలతో తయారయిన హారాన్ని ధరించి, మృతదేహం పై కూర్చుని ఉంటుంది. ఈమె నాలుక బయటకు పొడుచుకొని వచ్చినట్లుగా ఉంటుంది. కనుగుడ్లు ఎర్రగా గుండ్రంగా తిరుగుతూ ఉంటాయి. ఈమె నాలుగు హస్తాలతో మూడు నేత్రాలతో కనిపిస్తుంది. మానవ మాంసం మరియు ఎముకలతో తయారయిన ఆభరణాలను ఈమె ధరించి ఉంటుంది. ఈమె అందమైన ముఖాన్ని కలిగి ఉంటుంది. నీలి రంగులో ఉండి ప్రకాశించే ఆర్సెనిక్ అనే లవణం యొక్క శరీర ఛాయను కలిగి ఉంటుంది..🙏

11. ఘన :-

పదకొండవది అయిన ఘన నిత్య ! ఈమె నాలుగు చేతులతో, మూడు నేత్రాలతో కనిపిస్తుంది. నగ్నంగా సంచరించడం ఈమెకు ఆనందం. భయంకరమైన దంతాలు, నోటి చివరల నుంచి రక్తం దారులుగా కారుతూ ఉంటుంది. ఈమె చేతులలో ఖడ్గము, డాలు, త్రిశూలం , దండం ఉంటుంది. 🙏

 

12. బాలక :-

పన్నెండవ నిత్య అయిన బాలక నిత్య ! నగ్నంగా ఉండి చూడటానికి భయంకరంగా కనిపిస్తుంది. ఈమె నాలుగు హస్తాలతో మూడు నేత్రాలను కలిగి ఉంటుంది. ఈమె ఎప్పుడూ మధ్యపు మత్తులో ఉంటుంది. ఎడమ చేతులలో ఖడ్గము మరియు మానవ శిరస్సు ఉండగా కుడిచేతులలోని ఒక చేతిలో కపాలపాత్ర , ఇంకో చేతి వేలితో బెదిరిస్తూ కనిపిస్తుంది. ఈమె పుర్రెలతో కట్టబడిన కోటమీద కూర్చుని ఉంటుంది.🙏

13. మాత్ర :-

పదమూడవది అయిన మాత్ర నిత్య మృతదేహం పై కూర్చుని ఉండి, శరీరంపై నీలిరంగు లేపనం పుయ్యబడి ఉంటుంది. ఈమెకు కపాల హారం ఉంటుంది. చేతులలో కపాల పాత్ర, కత్తెర, ఖడ్గం శిరస్సు కనిపిస్తాయి. 🙏

14. ముద్ర :- 

పద్నాల్గవది అయిన ముద్ర నిత్య నగ్నంగా ఉండి నీలి కలువ శరీర ఛాయను కలిగి ఉంటుంది. ఈమె మూడు మెల్లకళ్ళను కలిగి ఉంటుంది. నాలుగు హస్తాలు, మెడలో శిరస్సులతో చేయబడిన హారం ఉంటుంది. ఈమె పెదవులపై రక్తం కనిపిస్తుంది. చేతులలో కపాల పాత్ర , బాకు, ఖడ్గం, డాలు ఉంటాయి.🙏

15. మిత :-

పదిహేనవది అయిన మిత నిత్య ! అందమైన పిరిదులు మరియు కారునలుపు రంగులో ఉంటుంది. భయంకరమైన రూపాన్ని కలిగి ఉంటుంది. విరబోసుకున్న జుట్టుతో ఎర్రటి దుస్తులు ధరించి కనిపిస్తుంది. కపాల మాలతో కనిపించే ఈ నిత్య ఒక మృతదేహం పై కూర్చుని ఉంటుంది. నాలుగు చేతులు, మూడు నేత్రాలను కలిగి ఉంటుంది. ఎడమ చేతులలో ఖడ్గము, శిరస్సు కనిపిస్తాయి. కుడిచేతిలో ఒక చేయి అభయ హస్తం, ఇంకోక చేయి వరద హస్తముగా కనిపిస్తుంది. ప్రళయ కాలంలో కనిపించే విలయాగ్నికి కోటిరెట్లు అధికమైన అగ్ని కాంతితో ఈమె దర్శనం ఇస్తుంది.🙏

🚩సర్వేజనా సుఖినోభవంతు 🚩

కనకధార స్తోత్రం .....

కనకధార స్తోత్రం .....

( చాల శక్తివంతమైనది.)

ఈ స్తోత్రం ప్రతిరోజూ చదివితే ఆర్ధిక సమస్యలు సమసిపోతాయి.

శ్రీ శంకర భవత్పాదులు ఒకరోజు భిక్షకు వెళ్ళినపుడు కడు బీదరాలైన ఒక అవ్వ స్వామికి భిక్ష ఇవ్వడానికి తనవద్ద యేమిలేకపోయేసరికి బాధతో,

ఇల్లంతా వెతికితే ఒక ఉసిరిగకాయ మాత్రమే ఆమెకి దొరికింది.

"స్వామి నా దగ్గర బిక్ష ఇవ్వడానికి ఈ ఉసిరి మాత్రమే ఉంది " అని గురువుకి సమర్పించింది. ఆమె భక్తికి ఆచార్యుల హృదయం ద్రవించి,

ఆమె దారిద్ర్యాన్ని తొలగించడానికి లక్ష్మీదేవిని స్తుతించారు.

లక్ష్మీదేవి ప్రసన్నయై,

స్వామి కోరినట్లు,

ఆ ముసలమ్మ ఇంట కనకవర్షం కురిపించింది. ఆ స్తోత్రమే కనకధారస్తోత్రం.

ఈ స్తోత్రమును పఠించినవారికి లక్ష్మీదేవి ప్రసన్నురాలై సర్వాభీష్ట సిద్ధి కలుగచేస్తుంది.

1. అఙ్గం హరేః పులకభూషణ మాశ్రయంతీ

భృఙ్గాఙ్గనేవ ముకుళాభరణం తమాలం

అఙ్గీకృతాఖిల విభూతి రపాఙ్గలీలా

మాఙ్గళ్యదాస్తు మమ మఙ్గళదేవతాయాః

భావం :- మొగ్గలతో నిండియున్న చీకటి కానుగ చెట్టుకు ఆడుతుమ్మెదలు ఆభరణములైనట్లు, పులకాంకురములతోడి శ్రీహరి శరీరము నాశ్రయించినదియు, సకలైశ్వర్యములకు స్థానమైనదియు అగు లక్ష్మీదేవి యొక్క చక్కని క్రీగంటిచూపు నాకు శుభములను ప్రసాదించుగాక

2. ముగ్ధాముహు ర్విదధతీ వదనే మురారేః

ప్రేమత్రపా ప్రణిహితాని గతాగతాని

మాలా దృశో ర్మధుకరీవ మహోత్పలేయ

సా నే శ్రియం దిశతు సాగర సంభవాయః

భావం :- పెద్ద నల్లకలువపైనుండు ఆడుతుమ్మెదవలె శ్రీహరి ముఖమునందు ప్రేమ లజ్జలచే ముందుకు వెనుకకు ప్రసరించుచున్న సాగర సంజాత అయిన యా లక్ష్మీదేవి యొక్క కృపాకటాక్షము నాకు సంపదను ప్రసాదించుగాక

3. ఆ మీలితాక్ష మధిగమ్య ముదా ముకుందం

ఆనందకంద మనిమేష మనఙ్గ తంత్రం

ఆకేకర స్థిత కనీనిక పష్మ నేత్రం

భూత్యై భవే న్మమ భుజఙ్గ శయాఙ్గనాయాః

భావం :- నిమీలిత నేత్రుడును, ఆనందమునకు కారణభూతుడు అయిన మురారిని సంతోషముతో గూడుటచే, ఱెప్పపాటు లేనిదియు, కామ వశమైనదియు, కుచితమైన కనుపాపలును, ఱెప్పలును గలదియు అగు లక్ష్మీదేవి యొక్క కటాక్షము నాకు సంపద నొసంగును గాక.

4. భాహ్వంతరే మధుజిథ శ్రితకౌస్తుభే య

హారావలీవ హరినీలమయీ విభాతి

కామప్రదా భగవతోపి కటాక్షమాలా

కల్యాణమావహతు మే కమలాలయాః

భావం :- భగవంతుడగు శ్రీహరికిని కామప్రదయై, అతని వక్షస్థలమందలి కౌస్తుభమున ఇంద్రనీలమణిమయమగు హారావళివలె ప్రకాశించుచున్న కమలాలయ అగు లక్ష్మీదేవి యొక్క కటాక్షమాల నాకు శుభమును చేకూర్చుగాక

5. కాలాంబుదాలి లలితోరసి కైటభారేః

ధారా ధరే స్ఫురతి యా తటిఙ్గ నేవ

మాతు స్సమస్త జగతాం మహనీయ మూర్తిః

భద్రాణి మే దిశతు భార్గవనందనాయాః

భావం :- కారుమబ్బులపై తోచు మెరుపుతీగ వలె నీలమేఘశ్యాముడగు విష్ణుదేవుని వక్షస్థలమందు ప్రకాశించుచున్న, ముల్లోకములకును తల్లియు, భార్గవ నందనయు అగు ఆ లక్ష్మీదేవి నాకు శుభముల నిచ్చుగాక

6. ప్రాప్తం పదం ప్రధమతః ఖలు యత్ప్రభావాత్

మాఙ్గల్యభాజి మధుమాధిని మన్మధేన

మయ్యాపతేత్తదిహ మంధర మీక్షణార్ధం

మందాలసం చ మకరాలయ కన్యకాయాః

భావం :- ఏ క్రీగంటి ప్రభావమున మన్మధుడు మాంగల్యమూర్తియగు మధుసూదనుని యందు ముఖ్యస్థానమును ఆక్రమించెనో అట్టి క్షీరాబ్ధి కన్య అగు లక్ష్మీదేవి యొక్క మందమగు నిరీక్షము నాయందు ప్రసరించునుగాక

7. విశ్వామరేంద్ర పదవిభ్రమ దాన దక్షం

ఆనందహేతు రధికం మధువిధ్విషోపి

ఈషన్నిషీదతు మయి క్షణ మీక్షణార్ధం

ఇందీ వరోదర సహోదర మిందిరాయాః

భావం :- సమస్త దేవేంద్ర పదవి నీయగలదియు, మురవైరియగు విష్ణువు సంతోషమునకు కారణమైనదియు, నల్లకలువలను పోలునదియు అగు లక్ష్మీదేవి కటాక్షము కొంచెము నాపై నిలిచియుండును గాక

8. ఇష్టా విశిష్టమతయోపి యయా దయార్ధ్ర

దృష్టా స్త్రివిష్టప పదం సులభం లభంతే

దృష్టిః ప్రవృష్ట కమలోదర దీప్తిరిష్టాం

పుష్టిం కృషీష్ట మమ పుష్క్రవిష్తరయ

భావం :- పద్మాసని అయిన లక్ష్మీదేవి దయార్ధ దృష్టివలననే విశిష్టమతులగు హితులు సులభముగా ఇంద్రపదవిని పొందుచున్నారు. వికసిత కమలోదర దీప్తిగల ఆ దృష్టి, కోరిన సంపదను నాకు అనుగ్రహించుగాక

9. దద్యాద్దయానుపవనో ద్రవిణాంభుధారా

అస్మిన్నకించిన విహఞ్గశిశౌ విషణ్ణే

దుష్కరమ ఘర్మ మపనీయ చిరాయ దూరం

నారాయణ ప్రణయినీ నయనాంబువాహః

భావం :- శ్రీమన్నారాయణుని దేవి అయిన లక్ష్మీదేవి దృష్టియనెడు మేఘము దయావాయు ప్రేరితమై, నా యందు చాలాకాలముగా ఉన్న దుష్కర్మ తాపమును తొలగించి, పేదవాడ ననెడి విచారముతో ఉన్న చాతకపు పక్షి అగు నాపై ధనవర్ష ధారను కురిపించునుగాక

10. గీర్దేవ తేతి గరుడధ్వజ సుందరీతి

శాఙ్కభరీతి శశిశేఖర వల్లభేతి

సృష్టి స్థితి ప్రళయకేళిషు సంస్థితాయ

తస్యై నమ స్త్రిభువనైక గురో స్తరుణ్యై

భావం :- వాగ్దేవత అనియు, గరుడధ్వజ సుందరి అనియు, శాకంభరి అనియు, శశిశేఖర వల్లభా అనియు పేరు పొందినదియు, సృష్టి, స్థితి, లయముల గావించునదియు, త్రిభువనములకు గురువైన విష్ణుదేవుని పట్టమహిషి అగు లక్ష్మీదేవికి నమస్కారము.

11. శ్రుత్యైనమోస్తు శుభకర్మ ఫలప్రసూత్యై

రత్యైనమోస్తు రమణీయ గుణార్ణవాయై

శక్త్యైనమోస్తు శతపత్ర నికేతనాయై

పుష్ట్యైనమోస్తు పురుషోత్తమ వల్లభాయై

భావం :- పుణ్యకార్యములు ఫలము నొసగు శ్రుతిరూపిణియు, సౌందర్య గుణసముద్ర యగు రతిరూపిణియును, పద్మనివాసిని అగు శక్తి రూపిణియు అగు లక్ష్మీదేవికి నమస్కారము.

12. నమోస్తు నాళీక నిభాననాయై

నమోస్తు దుగ్ధోదధి జన్మభూమ్యై

నమోస్తు సోమామృత సోదరాయై

నమోస్తు నారాయణ వల్లభాయై

భావం :- పద్మమును బోలిన ముఖము గలదియు, క్షీరసముద్ర సంజాతయు, చంద్రునికిని, అమృతమునకు తోబుట్టువును, నారాయణుని వల్లభయును అగు లక్ష్మీదేవికి నమస్కారము

13. నమోస్తు హేమాంభుజ పీఠికాయై

నమోస్తు భూమణ్డల నాయికాయై

నమోస్తు దేవాది దయాపరాయై

నమోస్తు శార్ఙ్ఙాయుధ వల్లభాయై

భావం :- బంగారు పద్మము ఆసనముగా గలదియును, భూమండలమునకు నాయిక అయినదియును, దేవతలలో దయయే ముఖముగా గలదియును, విష్ణువునకు ప్రియురాలును అయిన లక్ష్మీదేవికి నమస్కారము.

14. నమోస్తు దేవ్యై భృగు నందనాయై

నమోస్తు విష్ణోరురసి స్థితాయై

నమోస్తు లక్ష్మ్యై కమలాలయాయై

నమోస్తు దామోదర వల్లభాయై

భావం :- భృగుమహర్షి పుత్రికయును, దేవియు, విష్ణు వక్షస్థల వాసినియు, కమలాలయము, విష్ణువుకు ప్రియురాలును అయిన లక్ష్మీదేవికి నమస్కారము

15. నమోస్తు కాంత్యై కమలేక్షణాయై

నమోస్తు భూత్యై భువన ప్రసూత్యై

నమోస్తు దేవాదిభి రర్చితాయై

నమోస్తు నందాత్మజ వల్లభాయై

భావం :- తామరపువ్వు వంటి కన్నులు గలదియు, దేదీప్యమానమైనదియు, లోకములకు తల్లియు, దేవతలచే పూజింపబడునదియు, విష్ణువుకు ప్రియురాలు అగు లక్ష్మీదేవికి నమస్కారము

16. సంపత్కరాణి సకలేంద్రియ నందనాని

సామ్రాజ్య దాన విభవాని సరోరుహాక్షి

త్వద్వందనాని దురితా హరణోద్యోతాని

మామేవ మాత రనిశం కలయంతు మాన్యే

భావం :- పద్మములవంటి కన్నులు గల పూజ్యురాలవగు నోయమ్మా, నిన్ను గూర్చి చేసిన నమస్కృతులు సంపదను కల్గించునవి, సకలేంద్రియములకును సంతోషమును కలిగించునవి, చక్రవర్తిత్వము నొసగ గలవి, పాపములను నశింపచేయునవి, ఓ తల్లీ అవి ఎల్లపుడును నన్ను అనుగ్రహించుగాక

17. యత్కటాక్ష సముపాసనా విధిః

సేవకస్య సకలార్ధ సంపదః

సంతనోతి వచనాఞ్గ మానసై

త్వాం మురారి హృదయేశ్వరీం భజే

భావం :- ఏ దేవి యొక్క కటాక్ష వీక్షణమున సేవకులకు సకలార్ధ సంపదలు లభించునో, అట్టి మురారి హృదయేశ్వరి యగు లక్ష్మీదేవిని మనోవాక్కాయములచే త్రికరణశుద్ధిగా సేవింతును

18. సరసిజనిలయే సరోజ హస్తే

ధవళతమాం శుక గంధమాల్యశోభే

భగవతి హరివల్లభే మనోఙ్ఞే

త్రిభువనభూతి కరి ప్రసీద మహ్యం

భావం :- కమలములవంటి కన్నులు గల ఓ తల్లీ, చేతియందు పద్మమును ధరించి, తెల్లని వస్త్రము, గంధము, పుష్పమాలికలతో ప్రకాశించుచున్న భగవతీ, విష్ణుప్రియా, మనోఙ్ఞురాలా, ముల్లోకములకును సంపదను ప్రసాదించు మాతా, నన్ననుగ్రహింపుము

19. దిగ్ఘస్తిభిః కనక కుంభ ముఖావసృష్ట

స్వర్వాహినీ విమలచారు జలాప్లుతాఙ్ఞీం

ప్రాత ర్నమామి జగతాం జననీ మశేష

లోకాధినాధ గృహిణీ మమృతాబ్ధి పుత్రీం

భావం :- దిగ్గజములు కనకకుంభములతో తెచ్చిన వినిర్మల ఆకాశ జలములచే అభిషేకించబడిన శరీరము కలదియు, లోకములకు జననియు, విశ్వప్రభువగు విష్ణుమూర్తి గృహిణియు, క్షీరసాగర పుత్రియు అగు లక్ష్మీదేవికి ఉదయమున నమస్కరించుచున్నాను.

20. కమలే కమలాక్ష వల్లభేత్వం

కరుణాపూర తరఙ్ఞితై రపాఙ్ఞైః

అవలోకయ మా మకిఞ్చనానాం

ప్రధమం పాత్రమ కృత్రిమందయాయాః

భావం :- శ్రీహరి వల్లభురాలివైన ఓ లక్ష్మీదేవి, దరిద్రులలో ప్రధముడను, నీ దయకు తగిన పాత్రమును అగు నన్ను నీ కరుణాకటాక్షముతో చూడుము.

21. స్తువంతి యే స్తుతిభిరమాభిరన్వహం

త్రయీమయీం త్రిభువనమాతరం రమాం

గుణాధికా గురుతర భాగ్యభాగినో

భవంతి తే భువి బుధ భావితాశయాః

భావం :- ఎవరీ స్తోత్రములచే ప్రతిరోజు వేదరూపిణియు, త్రిలోకమాతయు అగు లక్ష్మీదేవిని స్తుతింతురో వారు విద్వాంసులకే భావితాశయులై, గుణాధికులై అత్యంత భాగ్యశాలురగుచున్నరు.

22. సువర్ణ ధారాస్తోత్రం య చ్చఙ్కరాచార్య నిర్మితం

త్రిసంధ్యం యః పఠేన్నిత్యం స కుబేరసమోభవేత్

భావం :- శ్రీ శంకరాచార్యులచే రచించబడిన కనకధారాస్తోత్రమును ప్రతిరోజు, త్రికాలములందు పఠించువారు కుబేరునితో సమానుడగును.

వివరణ : ఏ స్తోత్రాన్ని పఠించి ఫలం పొందాలన్నా, భక్తి ముఖ్యం. భక్తి లేని పారాయణం, చిల్లులు పడిన కుండలోపోసిన నీళ్ళవలె వృధా అవుతుంది. సర్వం మహాలక్ష్మీ ఆధీనం. ఆ తల్లి అనుగ్రహిస్తే సకల జీవులు ఇహ పర సుఖ జీవనులై ఉంటారు. కామక్రోధాధులైన అరిషడ్వర్గమే మహా శత్రువులు. వాళ్ళు నశిస్తేనే మానవులు శుద్ధాంతఃకరణులవుతారు. భగవదనుగ్రహపాత్రులవుతారు. అట్టివారిని మహాలక్ష్మి తన బిడ్డలుగా ఆదరించి రక్షిస్తుంది. అంతఃశత్రువుల్ని కూల్చాలంటే మహాలక్ష్మిని భక్తిశ్రద్ధలతో స్తుతించి, పూజించాలి. త్రిలోకాధిపతియగు ఇంద్రుడు గావించిన ఈ దివ్య శ్తోత్రాన్ని మహర్షులు మనకు అనుగ్రహించారు.

!! లోకా సమస్తా సుఖినో భవంతు ... !!

వారం రోజులు - ఏ రోజు ఏం చేయాలి.......!!

వారం రోజులు - ఏ రోజు ఏం చేయాలి.......!!

మానవుడు ఏ రోజు ఏం చేయాలి? 

ఏం చేస్తే పుణ్యఫలితం దక్కుతుంది. ఏ రోజు ఏం కార్యాలు చేయాలి..? 

ఏ దేవున్ని పూజించాలి..? 

ఈ విషయాలు నిత్యం అందరికి అవసరమే. 

ఏ రోజే ఏం చేయాల్లో శాస్త్రాలు వివరించాయి. 

ఇక ఏ రోజు ఏ దేవుడికి పూజ చేస్తే ఎలాంటి పుణ్యఫలితం దక్కుతుందో శివ మహా పురాణం విద్యేశ్వర సంహిత 14వ అధ్యాయం వివరించింది. దేవతల ప్రీతి కోసం 5 విధాలైన పూజ ఏర్పడింది. 

మంత్రాలతో జపం, హోమం, దానం, తపస్సు, సమారాధనలు అనేవే 5 విధాలు. సమారాధనం అంటే దేవుడి ప్రతిమ నుంచే వేదిక. ప్రతిమ, అగ్ని, లేక బ్రాహ్మణుడిని షోడశోపచారాలతో పూజించటం ఈ 4 రకాలలో ఒక దానికంటే ఒకటి ఉత్తమమైనది. పూజలు మనకున్న 7 వారాలలో ఒక్కొక్క వారం ఒక్కొక్క దేవతకు చేయాల్సి ఉంటుంది.

ఆదివారం చేయాల్సిన కార్యాలు........

ఉత్తర దిశగా ప్రయాణం, ఉద్యోగంలో చేరడం, మంగళ కృత్యాలు, ఉత్సవాలు, నృపాభిషేకం, లోహం, చెక్క, చర్మ, ఊక పనులు, యుద్ధం, అస్తక్రర్మలు, వ్యవసాయపు పనులు, ధ్యానక్రియలు, ఔషధ సేవనం, వైద్యం, ఉల్లి, పొగాకు, మిర్చి.. వంటి తోటలు వేయడం, కెంపు ధరించడం చేయవచ్చు.

ఆదివారం చేయాల్సిన పూజలు.....

ఆదివారం ఆదిత్యుడిని, ఇతర దేవతలను, వేద పండితులను పూజించాలి. ఆదిత్య పూజ వల్ల నేత్ర వ్యాధులు, శిరోరోగం, కుష్ఠువ్యాధి తగ్గుతాయి. ఆదిత్యుడిని పూజించి వేద పండితులకు భోజనం పెట్టాలి. ఇలా ఒక రోజు నుంచి ఒక మాసం, ఒక సంవత్సరం లేక 3 సంవత్సరాల పాటు రోగ తీవ్రతనను బట్టి పూజ చేయాలి. దీనివల్ల సూర్యానుగ్రహప్రాప్తి కలుగుతుంది.

సోమవారం చేయాల్సిన కార్యాలు......

దక్షిణ దిక్కు ప్రయాణించడం, కృషి క్రియలు, సమస్త వాస్తు కర్మలు చేయవచ్చు. ఇంకా.. ముత్యం, స్ఫటికం, నూతులు, కాలువలు, చెరువులు, జలం, ఉపనయనం, భూమి, పైకప్పులు, సంగీతం, నృత్య, నాటకాలు, స్తంభ ప్రతిష్ట, భూ సంబంధ కార్యాలు, తెల్లని వస్త్రాలు ధరించడం, వెండి వస్తువులు ఉపయోగించడం, ముత్యాలు ధరించడం, నృత్యాది కళలు ప్రారంభించవచ్చు.

సోమవారం చేయాల్సిన పూజలు.....

సంపద కోరుకోనేవారు సోమవారం లక్ష్మీదేవిని ఆరాధించాలి. ఆ రోజున పూజ తర్వాత వేద పండిత దంపతులకు నెయ్యితో భోజనం పెట్టాలి.

మంగళవారం చేయాల్సిన కార్యాలు....

తూర్పు దిక్కుకు ప్రయాణించడం, పగడపు ఉంగరం ధరించడం చేయవచ్చు. కోర్టు వ్యవహారాలు, ధైర్య సాహస విషయాల్లో అడుగుముందుకేయడం, అగ్ని, ఆయుధ, ఉగ్ర, అసత్యక్రియలు, వెండి, బంగారం, రాగి, ఇత్తడి, ఇనుము, ధాతువులు కరిగించడం, కందులు, వేరుశనగ వంటి ధాన్యాలు సాగు చేయడం.. వంటివి చేయవచ్చు.

మంగళవారం చేయాల్సిన పూజలు....

ఆరోగ్య సమస్యలు తగ్గేందుకు మంగళవారం కాళీ దేవతను పూజించాలి. మినుము, కంది, పెసరపప్పులతో చేసిన పదార్థాలతో వేద పండితులకు భోజనం పెట్టాలి.

బుధవారం చేయాల్సిన కార్యాలు.....

ఈ రోజు పడమట దిక్కుకు ప్రయాణం మంచిది. నూతన వ్యాపారాలు, యుక్తిగా కార్యాలు నిర్వర్తించవచ్చు. బంగారం మొదలైన నగలు చేయడం, వాహనం, శిల్పం, విద్య, రాజీలు, వివాహం, వ్యాపారం, క్రయవిక్రయాలు, దస్తావేజులు, చిత్ర గణితం, శిల్ప గణిత శాస్త్రాది విద్యలను అభ్యసించడం, అరటి, కొబ్బరి, మామిడి తోటలు పెంచడం, పెసలు మొదలైన పైర్లు వేయడం చేయవచ్చు. 

బుధవారం చేయాల్సిన పూజలు....

బుధవారం రోజు పెరుగు అన్నాన్ని విష్ణు దేవునికి నివేదించాలి. ఈ పూజ, నివేదనల వల్ల పూజ చేసిన వారి కుమారులు, మిత్రులు, భార్య తదితరులకు చక్కటి ఆరోగ్యం ప్రాప్తిస్తుంది.

గురువారం చేయాల్సిన కార్యాలు.....

గురువారం రోజు పడమర దిక్కు దిశగా ప్రయాణం చేయడం మంచిది. యజ్ఞయాగాది క్రియలు, వివాహాది శుభకార్యాలు, వైదిక కార్యాలు, నూతన విద్యారంభం, వృక్షదోహదక్రియలు, అలంకార ధారణ క్రియలు, గురువులను, దేవతలను పూజించడం, యుద్ధారంభం, తీర్థయాత్రలు, అక్షరాభ్యాసం, శనగలు, చెరుకు, ప్రత్తి వంటి వ్యాపారాలు ప్రారంభించడం, పుష్యరాగం ధరించడం మొదలైనవి. దస్తావేజులు, ఒప్పంద పత్రాలు రాయడం మంచిది కాదని సంప్రదాయం.

గురువారం చేయాల్సిన పూజలు...

ఆయుష్షును, ఆరోగ్యాన్ని కోరేవారు తమ ఇష్టదైవానికి గురువారం రోజున పాలతో, నెయ్యితో చేసిన పదార్థాలను నివేదించాలి. వస్త్రాలను కూడా నివేదించి అర్చన చేయడం కూడా శుభకరం.

శుక్రవారం చేయాల్సిన కార్యాలు....

శుక్రవారం రోజున ఉత్తరం దిక్కు దిశగా ప్రయాణం మంచిది. నూతన వస్త్రాలు ధరించడం, కొనడం, రాజకీయ రంగ ప్రవేశం చేయడం శుభకరం. స్ర్తీ సంబంధ క్రియలు, ముత్యం వజ్రం, వైఢూర్యం, ఆభరణ ధారణ, సుగంధ శయ్యా భరణాలు, ఉద్యోగ కృషి, వ్యవసాయం, కాలు వలు, వివాహం, పుష్ప సంబంధమైన మంగళ కార్యాలు, ధాన్య సంబంధ పనులు ప్రారంభించడం, సాహిత్య విషయాలు, కళలు నేర్చుకోవడం మంచిది. 

శుక్రవారం చేయాల్సిన పూజలు...

శుక్రవారం రోజు కూడా ఇష్టదైవాన్ని శ్రద్ధతో ఆరాధించాలి. ఈ రోజు పూజానంతరం వేదపండితుల తృప్తి కోసం షడ్రుచులతో కూడిన భోజనాన్ని పెట్టాలి. స్త్రీల తృప్తి కోసం మంచి మంచి వస్త్రాలను బహూకరించడం మంచిది.

శనివారం చేయాల్సిన కార్యాలు....

గృహ నిర్మాణాది క్రియలు చేయడం మంచిది. చెక్కడం, కొట్టడం, సీసపు పనులు, దీక్షావలం బన, తగరం, లోహపు పనులు, స్థిరమైన పనులు, ఆవులు, గేదెలు మొదలగువాని పనులు, ఇనుమునుకు సంబంధించినవి, పాప కార్యాలు, అసత్య వాదన, దాసదాసీలను చేర్చుకోవడం మొదలగు పనులకు మంచిది. 

శనివారం చేయాల్సిన పూజలు.....

శనివారం రుద్రాది దేవతల ఆరాధన మంచిది. అపమృత్యువు నుంచి తప్పించుకోవాలనుకునేవారు ఆనాడు నువ్వులతో హోమం చేసి నువ్వులను దానం ఇచ్చి నువ్వులు కలిపిన అన్నంతో పండితులకు భోజనం పెట్టాలి. ఇలా చేయటం వల్ల పూజ చేసిన వ్యక్తికి మంచి ఆరోగ్యం చేకూరుతుంది. శని దోష పూజాది కార్యక్రమాలు కూడా చేయవచ్చు.

దగ్ధ యోగం.. ఈ ముహూర్తం లో వివాహం జరుగదు అని శాస్త్రం చెబుతోంది

ఇది దగ్ధ యోగం.. ఈ ముహూర్తం లో వివాహం జరుగదు అని శాస్త్రం చెబుతోంది అంటారు మాయాబజార్ లో శంఖు తీర్థుల వారు. 

మామూలుగా త్రయోదశి యా అని పంచాంగం చూసే కొందరు పెద్దలు పెదవి విరవడం చూస్తాము గానీ మన లెక్క ప్రకారము అది విజయమే చేకూరుస్తుంది.

పాశ్చాత్యులు ప్రకారం పదమూడు సంఖ్య అచ్చిరాదు అంటారు. అసలు దగ్ధ యోగం అంటే వారానికి మరియు ఆనాటి తిథి కలిపితే పదమూడు వస్తే అది దగ్ధ యోగము.

ఆదివారం      1  నాడు ద్వాదశి వస్తే అది దగ్ధ యోగం

సోమవారం    2 నాడు ఏకాదశి వస్తే అది దగ్ధ యోగము

మంగళవారం 3 నాడు దశమి వస్తే అది దగ్ధ యోగము

బుధవారం.    4 నాడు నవమి వస్తే అది దగ్ధ యోగము

గురువారం.    5 నాడు అష్టమి వస్తే అది దగ్ద యోగము

శుక్రవారం.      6 నాడు సప్తమి వస్తే అది దగ్ధ యోగము

శనివారం.       7 నాడు షష్ఠి  వస్తే అది దగ్ధ యోగము

మాయాబజార్ చిత్రాన్ని ఎంతో విద్వత్తు ఉన్నవారు తీశారు కాబట్టి అన్నీ కూలంకషంగా చర్చించి పాటించారు అందులో..ఈ కాలం వారికి ఏం పాండిత్యం ఉందని..నాలుగు అల్లరి మాటలు, చిల్లర.పదాలు వ్రాసేసి ఇదే సర్వం అనుకునే పిదపకాలం

నాగలమడక సుబ్రహ్మణ్య స్వామి చరిత్ర, కర్నాటక

*నాగలమడక సుబ్రహ్మణ్య స్వామి చరిత్ర, కర్నాటక* 

కర్నాటక రాష్ట్రము నందు, మూడు ప్రఖ్యాత సుబ్రహ్మణ్య క్షేత్రాలు కలవు. అవి ఆది సుబ్రహ్మణ్య (కుక్కే సుబ్రహ్మణ్య) , మధ్య సుబ్రహ్మణ్య (ఘాటి సుబ్రహ్మణ్య) మరియు అంత్య సుబ్రహ్మణ్య (నాగలమడక (పావగడ నగలమడికే సుబ్రహ్మణ్య)) అనే మూడు అద్భుతమైన క్షేత్రాలు.

ఈ మూడూ కలిపితే ఒక సర్పాకారం ఏర్పడుతుంది.

🌱ఈ మూడు క్షేత్రాలను ఎవరు దర్శించి స్వామిని ఆరాధిస్తారో, వారికి ఉన్న సకల కుజ, రాహు, కేతు దోషములు, సకల నవగ్రహ దోషములు పరిహరింపబడి, స్వామి అనుగ్రహమును పొంది, సకల అభీష్టములు పొందుతారు.

🌱ఈ ప్రదేశం ఆనాడు విజయనగర రాజుల ఆస్థానానికి చెందినదని అంటారు.

🌱శ్రీరామచంద్రుడు వనవాస కాలంలో నాగలమడకలో నివాసం ఉన్నట్లు చారిత్రక ఆధారాల ద్వారా తెలుస్తోంది. శ్రీరాముడు ఈప్రదేశం వదలి కామనదుర్గ (నీళ్లమ్మనహళ్ళి) కాకాద్రి కొండకు ప్రయాణ మైనట్లు చెబుతారు. ఈ కొండనే కామిలకొండ అని పిలుస్తారు. ఈ కొండపై శ్రీ రామచంద్ర స్వామి వారి గుడి ఉన్నది

🌱నాగలమడకలో అన్నంభట్టు అనే బ్రాహ్మణుడు ఉండేవారని ఆయన సుబ్రహ్మణ్యేశ్వర స్వామి భక్తుడిగా వుంటూ దక్షిణ కర్ణాటక ప్రాంతంలోని కుక్కే సుబ్రహ్మణ్యేశ్వర స్వామి దర్శనానికి ప్రతి సంవత్సరం కాలి నడకన హాజరయ్యేవారని అంటారు.

🌱ఒకసారి వృద్ధాప్యంలో అన్నంభట్టు గారు కుక్కేలో రథం లాగే సమయానికి చేరుకోలేక పోయారని, అయితే భక్తులు ఎంతమంది లాగినా కూడా రథం ముందుకు కదలక అలాగే నిలిచి పోయిందని అన్నంభట్టు గారు అక్కడకు చేరుకొని రథం పగ్గాలపై చేయి వేసిన వెంటనే రథం కదిలిందని పూర్వీకులు చెబుతారు.

🌱నాగలమడక సుబ్రహ్మణ్య స్వామి చరిత్ర

నాగాభరణం…

🌱వృద్ధాప్యంలో ఇక్కడకు రాలేవని అందువల్ల నాగలమడకలోనే ఉంటూ సేవ చేయమని చెప్పి నాగాభరణంను అన్నంభట్టుకు కుక్కే సుబ్రహ్మణ్య స్వామి ఇచ్చినట్లు పెద్దలు పేర్కొంటున్నారు.

🌱ఆ నాగాభరణంను తీసుకువచ్చి ఇక్కడ ప్రతిష్ఠించడం వల్లనే నాగలమడక అని పేరు వచ్చిందంటారు.

🌱అది కూడా స్వామి కలలో కన్పించి పెన్నానది పరివాహకం వద్దనే ప్రతిష్ఠించమని చెప్పడంతో నాగుల కోసం వెతుకుతున్న సందర్భంలో ఒక రైతు పొలంలో నాగలితో దున్నుతుండగా ఆ సమయంలో నాగులను పోలిన రాళ్ళు లభ్యం కావడంతో ఆ రాళ్ళనే ప్రతిష్ఠించినట్లు చెబుతారు.

🌱ప్రారంభంలో కేవలం నాలుగు స్తంభాలు నిలబెట్టి రాతిబండపరచి మంటపాన్ని నిర్మించారని రొద్దంకు చెందిన బాలసుబ్బయ్య అనే వ్యక్తి ఈ మంటపంలో వ్యాపారంకు సంబంధించిన సరుకులు పెట్టుకుని నిద్రిస్తుండగా స్వామి కలలో కనిపించి ఆలయం నిర్మించాలని చెప్పడం తో ఆయన ఆలయ నిర్మాణానికి కృషి చేసి సఫలీకృతుడైనట్లు తెలిసింది.

🌱కావున ఆ వంశానికి చెందిన వ్యక్తులు ఇప్పటికీ ప్రతి సంవత్సరం ఇక్కడ జరిగే రథోత్సవంలో అన్నదాన కార్యక్రమం నిర్వహిస్తున్నారు.

🌱నాగలమడకలోని సుబ్రహ్మణ్యేశ్వర స్వామి ఆలయంలో ఉండే శిల్పం సుందరంగా మూడుచుట్లు చుట్టుకుని ఏడు శిరస్సు లు కల్గిన మూడు అడుగుల నాగప్పస్వామి శిల్పం చూసిన భక్తులకు తక్షణం భక్తి భావన కలుగుతుంది.పుల్లివిస్తర్ల విశిష్టత…

🌱ప్రతి ఏడాదికి ఒకసారి నిర్వహించే బ్రహ్మ రథోత్సవంలో లక్షలాది మంది తమ మొక్కుబడులు తీర్చడానికి ఈ ప్రాంతానికి వస్తువుంటారు. అందులో విశిష్టమైనది పుల్లివిస్తర్లు (బ్రాహ్మణులు భోజనం చేసి వదిలిన ఆకులు) తలపై పెట్టుకుని పినాకిని నదిలో స్నానం చేయడం.

🌱స్వామి రథోత్సవం తర్వాత బ్రాహ్మణులు భోజనం పిదప విడిచిన పుల్లివిస్తర్లు ఏరుకుని వాటిని తలపై పెట్టుకుని నీరున్న చోట తలంటుస్నానాలు చేస్తే చేసిన పాపాలు పోయి మంచి జరుగుతుందని భక్తులు భావించడం విశేషం. అప్పటి వరకు వున్న ఉపవాస దీక్షను విరమించడం భక్తులు అనవాయితీ.

🌱ఈ జాతరలో రైతులకు ఈ ఎద్దుల పరుష ప్రత్యేక ఆకర్షణ. కర్ణాటకలోని తుముకూరు జిల్లాలో అతి పెద్ద ఎద్దుల పరుష ఇక్కడ జరుగుతుంది. ఇక్కడకు తుముకూరు జిల్లా మరియు ఆంధ్ర రాష్ట్రంలోని అనంతపురం జిల్లాల నుంచి అధిక సంఖ్యలో ఎద్దులు చేరుకుని దాదాపు 10 రోజులపాటు ఎద్దుల అమ్మకాలు, కొనుగోలు జరుగుతాయి.

🌱అంత్య సుబ్రహ్మణ్యం పేరుతో వెలసిన ఈ స్వామి ఆలయానికి విశిష్ట ఖ్యాతి నెలకొనివుంది.

ఆంధ్రప్రదేశ్, కర్ణాటక రాష్ట్రాల్లోని భక్తుల పాలిట కొంగుబంగారమై విరాజిల్లుతోంది.